VR hlaðvarpið

Ýmsum hugtökum er fleygt fram um þessar mundir í tengslum við kjarasamninga og efnahagsmál. Höfrungahlaup er eitt þeirra, þar sem alþjóðlegur barnaleikur er notaður sem myndlíking. Annað er Þjóðarsátt og þá vísað til þríhliða samninga sem gerðir voru á vinnumarkaði á síðustu öld. En hvað var Þjóðarsáttin og við hvað er átt þegar fólk kallar eftir Þjóðarsátt í dag? Halla Gunnarsdóttir, formaður VR og Ásgeir Brynjar Torfason, ritstjóri Vísbendingar fara yfir þetta og fleira ásamt Ögmundi Jónassyni, fyrrverandi ráðherra og fleira, sem var á vettvangi þegar Þjóðarsáttin var gerð. Þau reyna líka fyrir sér í höfrungahlaupi, en það náðist ekki á mynd.

Orðið aðhald kemur fyrir tæplega 300 sinnum í ræðusafni Alþingis á yfirstandandi þingi. En hvað er þetta aðhald? Halla Gunnarsdóttir, formaður VR, og Ásgeir Brynjar Torfason, ritstjóri Vísbendingar, halda áfram að spá í spilin í efnahagsmálum. Gestur þáttarins er Runólfur Pálsson, forstjóri Landspítala, sem segir frá því hvernig aðhald í ríkisfjármálum hefur áhrif á stærstu heilbrigðisstofnun landsins.

Allt hækkar og ekki lækka lánin! Í síðustu viku tilkynnti Seðlabankinn að stýrivextir yrðu óbreyttir. En til hvers eru eiginlega stýrivextir? Í þriðja þætti af hlaðvarpi VR H fyrir hagfræði fjalla Halla Gunnarsdóttir og Ásgeir Brynjar Torfason um tæki til að draga úr verðbólgu. Hávaxtastefnan er komin í þrot, segja þau, hún er hörð við skuldara og leigjendur en ívilnar þeim sem eiga peninga. Gestur þeirra að þessu sinni er Arnaldur Sölvi Kristjánsson, lektor við hagfræðideild Háskóla Íslands, sem hefur einstaklega mikinn áhuga á fjármálum hins opinbera. Hvert er samspilið á milli opinberra fjármála og peningastefnu

H fyrir hagfræði er hlaðvarpsþáttur þar sem fjallað er um efnahagsmál út frá sjónarhóli launafólks. Halla Gunnarsdóttir, formaður VR og Ásgeir Brynjar Torfason, doktor í fjármálum, kryfja hugmyndir á sviði hagfræðinnar og draga fram tengslin á milli kenninga og dagslegs lífs. Þau fá til sín góða gesti sem hafa sérþekkingu á sviði efnahagsmála og ræða bæði stórar og smáar hugmyndir, allt á mannamáli! Áherslur hagfræðingsins Mariönu Mazzucato um meiri virkni og aðkomu hins opinbera á mótun atvinnustefnu og þróun atvinnulífs voru til umræðu í nýju hlaðvarpi VR – H fyrir hagfræði – þar sem Sveinbjörn Finnsson, aðstoðarmaður ríkisstjórnarinnar, benti á að forsætisráðherra tali á svipuðum nótum. Mazzucato hélt erindi á fundi um mótun atvinnustefnu Íslands nýlega.

Ferðaþjónustan er orðin ein stærsta atvinnugreinin á Íslandi og í þessum þætti spjallar formaður VR, Halla Gunnarsdóttir, við konur sem starfa við fjölbreytt störf innan hennar. Rætt er við Eyrúnu Gunnarsdóttur, móttökustjóra hjá Fosshótelum, Eriku Martins Carneiro sem starfar sem leiðsögukona hjá Góu Travel og Jennifer Schroder, söluaðila hjá 360 Wanderlust og stjórnarkonu í VR. Opið og fræðandi spjall um ferðaþjónustuna, reynslu erlendra kvenna af því að aðlagast íslensku samfélagi, framkomu ferðamanna og margt fleira.

Í tilefni af Kvennaári 2025 hefur VR hleypt af stokkunum hlaðvarpi um stöðu kvenna á vinnumarkaði. Í þessum þætti tekur Halla Gunnarsdóttir formaður VR á móti þeim Arndísi Arnarsdóttur hjá Hagkaup, Júlíönu Einarsdóttur hjá Aðföngum og Kristínu Sævarsdóttur hjá Húsasmiðjunni. Heiti þáttarins gefur fyrirheit um innihaldið, Margt hefur breyst til hins betra en það er alls konar eftir! Til umræðu er kvennabaráttan, þriðja vaktin og þrjú b – blæðingar, barneignir og breytingaskeiðið, svo fátt eitt sé nefnt.